زجل باللهجة الصعيدية
كتبت قبل ثورة 25 يناير
مقسوم لي ودخلت القسم |
مقبوض علىّ بلا إثم |
ولا حتى ليّ خصم ... |
ويابوى هناك ع الحَسْمْ |
أتارينهم في البوليس |
مابيندهوش بالإسم |
يابيشتموا بالأم |
يايعلموا ع الجسم |
تهمتي نسيت البطاقة |
ولا لىّ ف الشر جمل |
ولا لىّ ف الشر ناقة |
إنما جهل وحماقة |
كيف أتسوق ف البندر |
مش متسلح ببطاقة |
ليه اتمخطر وأتغندر |
وافتح للشر طاقه؟ |
كفوف صُولات متكلفه |
والمخبرين تضرب كدا متأففة |
كل التفاهم ع القفا ،والصدغ |
ضرب يجيب دفا |
أتحوش بأيد تلقى البعيد |
بالجزمه شاط ف المقعدة ... |
تلقى الآهات متعددة ومترددة |
قلت أتكلم ف التليفون |
قالوا أنت باين لك مجنون |
قر.. أنت سرقت مين |
انطق .. كنت رايح وين |
إن كنت هتسوق الجنون |
هانجننك.. |
ياروح أمك أنت ف كركون |
اليأس دب ف قلبي |
والخيبة لزمت جنبي |
ياربى .. كان إيه ذنبي ؟ |
فرت دموعي ودمع الرجال غالى |
نسيت حتى جوعي وسرحت أفكر ف خالي |
بس لو جالى |
عشان يضْمَنْي |
فوقني قلم جنني |
على صدغي طلع م الننى |
قالوا فـز بلاش كئابه |
قلت له يابيه داحنا غلابة |
قالي بالفم ..والكتابة |
يعرض غداّ ع النيابة |