الصبح بدري سمعت زعيقْ
وناس تقول شِدّْ بِقوَّهْ
صحيت ودوَّرت التنهـــــيق
طلعم صحابي من جوَّه
قالوا الحمــــــــار بينهَّق ليهْ
حطّي له ياكل ياوليّه
جابت لــــــى آكل آكل إيه؟
هو أنا فيه عندي شهيّه
جابت لي تبن وجابت فول
عشان أدوقه مفيش فايده
ماتت حبيبتي الناس بتقول
والنار فى قلبي ياهوه قايده
كانت بعافيه بقالها يومين
جابوا الطبيب اللي يداوى
إداها بدل الحقنة اتنين
زوِّد لها البلوه بلاوى
فضلت ترفّس ياعنيّه
م الألم ماشفتش النوم
قعدت تفرفر وشويَّه
جه عزرائيل أخد المعلوم
الحزن طب فى قلبي قوام
والدمع سال بل الرّْدمه
وكرهت كل البيطريين
من عزم تيار الصدمة
كانت قمر وجميله جمال
وكَسْمِهَا مش لحماره
تقولش مهره جمال وكمال
كانت كايده حِمَارات الحارة
كانت تشوفني فى أبعد غيط
تقطع رباطها وتجينى
ولما كنت أشوفها أزيط
ويدور غزل بينها وبيني
ولما كنت أشيل برسيم
ويكون الحِمل تقيل حبه
ألقاها تتكلم بالسيم
وتقولي هات عنك حبه
كان التفاهم بالتنهيق
والنظرة وبهز الودنه
نهيق ظريف ومفيهش زعيق
طول رقبتي كما المدنه
كات ع الطواله تقدّمني
وتقولي كل أنت الأول
أقولها ليدس فرست
تقولي لأ قدم فوّل
صوتها اللي كان سمعي بيرضاه
وكان تملى بيحلالى
مين اللي هايسمّعنى صداه
مين بعدها يرق لحالي
والله أترملت بدري
كات كل رسمالى
آهين يابختى وياقدرى
وآه من عذاب الليالي
خلاص صبحت فى دنيا الشوم
ماتت ومات أملى معاها
م اليوم راح أبكى وبعد اليوم
لحين مافى الاخره ألقاها
إتلمزوا واتمألسوا
ياولد أدم كلكم
طب قولوا لله البقاء
وليشكر الله سعيكم
